पुनम चन्दलाई सात दिनभित्र हाजिर हुन प्रहरीको निर्देशन
नेपाली राष्ट्रिय महिला भलिबल टोली तथा नेपाल पुलिस क्लबकी खेलाडी पुनम चन्दलाई नेपाल प्रहरीले सात दिनभित्र कार्यालयमा हाजिर हुन निर्देशन दिएको छ । लामो समयदेखि गैरहाजिर रहेको भन्दै प्रहरी प्रधान कार्यालयले सूचना जारी गर्दै चन्दलाई स्पष्टिकरणसहित उपस्थित हुन भनेको हो । प्रहरी प्रधान कार्यालयले २०८३ जेठ ११ गते सार्वजनिक सूचना जारी गर्दै पुनम चन्दसहित गैरहाजिर रहेका प्रहरी कर्मचारीलाई आफ्नो अनुपस्थितिको कारण खुलाउन निर्देशन दिएको जनाएको छ । कार्यालयका अनुसार चन्द २०८२ चैत १७ गतेदेखि गैरहाजिर रहँदै आएकी छन् । प्रहरी नियमावली २०७१ (संशोधनसहित) को नियम ११५ को दफा (२) बमोजिम प्रक्रिया पूरा गरी सूचना टाँस भइसकेकाले सात दिनभित्र सम्पर्कमा आउन भनिएको प्रहरीको सूचनामा उल्लेख छ । अन्यथा प्रचलित कानुनअनुसार कारबाही प्रक्रिया अघि बढाइने जनाइएको छ ।
पुनम चन्द नेपाली महिला भलिबल टोलीकी महत्वपूर्ण खेलाडीका रूपमा परिचित छन् । नेपाल भलिबल संघले आयोजना गरेको बन्द प्रशिक्षणमा समेत उनी सहभागी भएकी थिइन् । तर, केही समयअघि उनी अष्ट्रेलिया गएको बताइएको छ ।
हाल नेपाली महिला भलिबल टोली काभा महिला भलिबल च्याम्पियनसिपको तयारीमा जुटिरहेको भए पनि पुनम टोलीमा समावेश छैनन् । पुनमको अनुपस्थितिले टोलीको तयारी र प्रदर्शनमा असर पर्न सक्ने खेलकुद वृत्तमा चर्चा हुन थालेको छ ।
