राजधानीलाई देशका विभिन्न जिल्लासँग जोड्ने मुख्य मार्ग नागढुंगा–मुग्लिन सडक विस्तार आयोजनाको काम निर्धारित म्यादभित्र सम्पन्न नहुने भएको छ। आयोजनाले विभिन्न प्राविधिक तथा व्यवस्थापकीय समस्यालाई कारण देखाउँदै पुनः म्याद थप्ने तयारी गरेको छ। सडक विस्तारको काम ढिलो हुँदा दैनिक हजारौं यात्रुले धुलो, हिलो, जाम र जोखिमपूर्ण यात्रा गर्न बाध्य भएका छन्। विशेष गरी वर्षायाम सुरु भएसँगै सडकको अवस्था झन् चुनौतीपूर्ण बनेको छ। आयोजनाका अनुसार पेट्रोलियम पदार्थको मूल्यवृद्धि, बिटुमिनको अभाव तथा विद्युतका पोल सार्ने काममा भएको ढिलाइका कारण निर्माण कार्य प्रभावित भएको हो। यी समस्याका कारण निर्माण कम्पनीहरूले निर्धारित समयअनुसार काम अघि बढाउन नसकेको जनाइएको छ। पूर्वी खण्डअन्तर्गत पहिलो प्याकेजमा हालसम्म ८८ प्रतिशत भौतिक प्रगति भएको छ भने दोस्रो प्याकेजमा ५९ प्रतिशत मात्र काम सम्पन्न भएको छ। यस्तै, पश्चिम खण्डमा ४३ प्रतिशत भौतिक प्रगति भएको आयोजनाले जनाएको छ।

निर्धारित समय सकिन लाग्दा पनि समग्र प्रगति अपेक्षाअनुसार हुन नसकेपछि आयोजनाले सम्बन्धित निकायसँग थप समय माग्ने तयारी गरिरहेको छ। यद्यपि, पटक–पटक म्याद थपिँदा पनि काम सम्पन्न हुन नसकेको भन्दै स्थानीयवासी र यात्रुहरूले असन्तुष्टि व्यक्त गरेका छन्। नागढुंगा–मुग्लिन सडक देशकै अत्यन्त व्यस्त राजमार्गमध्ये एक भएकाले यसको स्तरोन्नति र विस्तार समयमै सम्पन्न हुनुपर्ने माग सरोकारवालाहरूले गर्दै आएका छन्। तर निर्माणमा भइरहेको ढिलाइले यात्रुहरूले अझै केही समय सास्ती व्यहोर्नुपर्ने अवस्था देखिएको छ।