काठमाडौं — डिफेन्डिङ च्याम्पियन रोयल च्यालेन्जर्स बेंगलुरुले इन्डियन प्रिमियर लिग (आईपीएल) २०२६ को फाइनल यात्रा तय गरेको छ । मंगलबार भएको क्वालिफायर–१ मा गुजरात टाइटन्सलाई १२ रनले पराजित गर्दै बेंगलुरु लगातार दोस्रो पटक फाइनलमा पुगेको हो । गत वर्ष पहिलो पटक उपाधि जितेको बेंगलुरुले यसपटक पनि उत्कृष्ट प्रदर्शन गर्दै उपाधि रक्षा गर्ने सम्भावना बलियो बनाएको छ । अब फाइनलमा बेंगलुरुले इलिमिनेटर विजेतासँग प्रतिस्पर्धा गर्नेछ । इलिमिनेटरमा सनराइजर्स हैदराबाद र राजस्थान रोयल्स आमनेसामने हुनेछन् । उक्त खेलको विजेताले क्वालिफायर–२ मा गुजरात टाइटन्ससँग खेल्नेछ । धर्मशालामा सम्पन्न खेलमा बेंगलुरुले दिएको २ सय ५५ रनको विशाल लक्ष्य पछ्याएको गुजरात १९.३ ओभरमा १ सय ६२ रनमै समेटियो । गुजरातका लागि राहुल तेवतियाले सर्वाधिक ६८ रन बनाए । उनले ४२ बलमा आठ चौका र चार छक्का प्रहार गरे पनि टोलीलाई जित दिलाउन सकेनन् । बेंगलुरुको बलिङमा ज्याकोब डफी चम्किए । उनले तीन विकेट हात पार्दै गुजरातको ब्याटिङ लाइनअप धराशायी बनाए ।

यसअघि टस हारेर पहिले ब्याटिङ गरेको बेंगलुरुले निर्धारित ओभरमा पाँच विकेट गुमाउँदै २ सय ५४ रनको विशाल योगफल तयार पारेको थियो । टोलीका कप्तान रजत पाटीदारले आक्रामक ब्याटिङ गर्दै ३२ बलमा ९३ रन बनाए । उनको इनिङ्समा पाँच चौका र नौ छक्का समावेश थियो । बेंगलुरुको लगातार उत्कृष्ट प्रदर्शनसँगै टोली समर्थक उत्साहित बनेका छन् । अब सबैको ध्यान फाइनलमा केन्द्रित भएको छ, जहाँ बेंगलुरुले लगातार दोस्रो उपाधि जित्ने लक्ष्य राखेको छ ।