माछापुच्छ्रे गाउँपालिका–४ स्थित चोरखोल्साको नाममा प्रत्येक वर्ष बजेट विनियोजन हुने तर काम भने अघि नबढ्ने अवस्था अन्ततः अन्त्य भएको स्थानीयवासीले बताएका छन्। वर्षौंदेखि चोरखोल्सा सडक योजनाको नाममा बजेट छुट्याइए पनि वास्तविक निर्माण नगरी रकम दुरुपयोग हुँदै आएको आरोप स्थानीय बुद्धिजीवी, समाजसेवी, राजनीतिक नेतृत्व तथा निर्माण व्यवसायीमाथि लाग्दै आएको थियो।

स्थानीयका अनुसार हरेक आर्थिक वर्ष चोरखोल्सा सडक निर्माणको नाममा लाखौं रुपैयाँ खर्च भएको विवरण सार्वजनिक गरिए पनि स्थलमा उल्लेखनीय काम नहुँदा योजना कागजमै सीमित हुने गरेको थियो। यसले स्थानीयवासीलाई सास्ती मात्र नभई विकासप्रतिको विश्वाससमेत कमजोर बनाएको उनीहरूको भनाइ छ।

तर यसपटक भने अवस्था फरक देखिएको छ। चोरखोल्सामा सडक निर्माण सम्पन्न भएसँगै वर्षौंदेखिको प्रतीक्षा अन्त्य भएको छ। सडक बनेपछि स्थानीयलाई आवतजावतमा सहज हुनुका साथै कृषि उत्पादन ढुवानी, दैनिक सेवा–सुविधामा पहुँच र समग्र स्थानीय विकासमा सकारात्मक प्रभाव पर्ने अपेक्षा गरिएको छ।

स्थानीयवासीले अब विकास योजनामा पारदर्शिता, प्रभावकारी अनुगमन र बजेटको सही उपयोग सुनिश्चित गर्न सम्बन्धित निकायसँग माग गरेका छन्। उनीहरूले विगतमा योजनाको नाममा भएको भनिएको अनियमितताबारे समेत आवश्यक छानबिन गरी दोषीमाथि कानुनी कारबाही हुनुपर्ने धारणा व्यक्त गरेका छन्।