लन्डन । बेलायतको एक विद्युत् केन्द्रमाथि इरानी ह्याकर समूहले लगातार चार दिनसम्म साइबर हमला गरी सञ्चालन प्रभावित पारेको दाबी गरिएको छ। घटनालाई बेलायतको महत्वपूर्ण पूर्वाधारमाथि भएको गम्भीर साइबर हमलामध्ये एक मानिएको छ। आक्रमणका कारण विद्युत् केन्द्रको सञ्चालन केही समयका लागि बन्द गर्नुपरेको बताइएको छ। यद्यपि, यसबाट बेलायतको समग्र विद्युत् आपूर्तिमा ठूलो असर परेको छैन। साइबर सुरक्षा विज्ञहरूले आक्रमणको उद्देश्य सर्वसाधारणको विद्युत् आपूर्ति अवरुद्ध गर्नु भन्दा महत्वपूर्ण पूर्वाधारमा आफ्नो पहुँच र प्राविधिक क्षमता प्रदर्शन गर्नु हुन सक्ने अनुमान गरेका छन्।

इरानसँग सम्बन्धित साइबर समूहहरू यसअघि पनि ऊर्जा तथा अन्य संवेदनशील पूर्वाधार लक्षित गतिविधिसँग जोडिँदै आएका छन्। यद्यपि, पछिल्लो घटनामा इरानी समूहको प्रत्यक्ष संलग्नता पुष्टि गर्न थप अनुसन्धान आवश्यक रहेको बताइएको छ। घटनाले विद्युत्, सञ्चार र अन्य महत्वपूर्ण पूर्वाधारलाई साइबर हमलाबाट सुरक्षित राख्नु बेलायतका लागि बढ्दो चुनौती बनेको देखाएको छ। साइबर आक्रमण अब डिजिटल प्रणालीमा मात्र सीमित नरही राष्ट्रिय सुरक्षा र भौतिक पूर्वाधारसम्म पुग्न थालेको यो घटनाले संकेत गरेको छ।