काठमाडौं। सिंहदरबारस्थित संघीय संसद् भवनमा प्रतिनिधिसभाको बैठक सुरु हुनासाथ विपक्षी दलहरूले विरोध जनाएका छन्। सभामुख डोलप्रसाद अर्यालले बैठकको कारबाही प्रारम्भ गर्नेबित्तिकै विपक्षी सांसदहरू आफ्नो आसनबाट उठेर विरोधमा उत्रिएका हुन्। बैठकमा नेपाली कांग्रेस, नेकपा (एमाले), नेपाल कम्युनिष्ट पार्टी, श्रम संस्कृति पार्टी तथा राष्ट्रिय प्रजातन्त्र पार्टीका सांसदहरूले एकैसाथ विरोध जनाएका थिए। विरोधका कारण सदनको वातावरण तनावपूर्ण बनेको थियो। विपक्षी दलहरूले गत जेठ १७ गते प्रधानमन्त्री बालेन्द्र शाहले भारतद्वारा नेपाली भूमि मिचिएको विषयमा दिएको अभिव्यक्तिप्रति असन्तुष्टि जनाउँदै निरन्तर संसद् अवरुद्ध गर्दै आएका छन्। उनीहरूले प्रधानमन्त्रीको भनाइबारे सरकारबाट स्पष्ट धारणा र जवाफ माग्दै संसद्मा विरोधलाई निरन्तरता दिएका हुन्।

यसअघि पनि यही विषयलाई लिएर प्रतिनिधिसभाका बैठकहरू प्रभावित हुँदै आएका छन्। विपक्षी दलहरूले सरकारको आधिकारिक धारणा स्पष्ट नभएसम्म आफ्नो विरोध जारी रहने संकेत दिएका छन्। संसद्को अवरोधले विधेयक, नीति तथा अन्य महत्त्वपूर्ण संसदीय कार्यसूची प्रभावित हुने देखिएको छ। सरकार र विपक्षी दलबीच सहमति खोज्ने प्रयास भए पनि अहिलेसम्म कुनै ठोस निष्कर्ष ननिस्कँदा संसदीय गतिरोध लम्बिने संकेत देखिएको छ।