काठमाडौं । परराष्ट्रमन्त्री शिशिर खनाल को भारत र चीन भ्रमणपछि नेपालको परराष्ट्र नीति आर्थिक कूटनीतिमा केन्द्रित रहेको स्पष्ट भएको छ। भ्रमणका क्रममा नेपालले आर्थिक विकास, पूर्वाधार निर्माण, लगानी प्रवर्द्धन र व्यापारिक सहकार्यलाई प्राथमिकतामा राखेको छ। भारतसँग सीमापार डिजिटल भुक्तानी, स्वास्थ्य सेवा, ऊर्जा तथा सांस्कृतिक सम्पदासम्बन्धी सहकार्यमा जोड दिइएको छ। यी परियोजनाले प्रत्यक्ष रूपमा नागरिक जीवन र आर्थिक गतिविधिमा प्रभाव पार्ने अपेक्षा गरिएको छ। यता चीनसँगको छलफलमा Belt and Road Initiative (BRI) अन्तर्गत पूर्वाधार विकास, कनेक्टिभिटी विस्तार र दीर्घकालीन रणनीतिक साझेदारीका विषय प्रमुख रूपमा उठेका छन्। चीनले नेपालसँग लगानी र क्षेत्रीय सम्पर्क सञ्जाल विस्तारमा चासो देखाएको छ।

परराष्ट्रमन्त्री खनालले नेपालले भारत र चीन दुवैसँग सन्तुलित, स्वतन्त्र र बहुआयामिक परराष्ट्र नीति अपनाउँदै राष्ट्रिय हितलाई केन्द्रमा राखेर सम्बन्ध विस्तार गर्ने बताएका छन्। उनका अनुसार लगानी, व्यापार, ऊर्जा र कनेक्टिभिटीका क्षेत्रमा सहकार्य बढाउँदै आर्थिक समृद्धिको लक्ष्य हासिल गर्ने सरकारको प्रयास रहनेछ।