पश्चिम नवलपरासीस्थित रोयल कटेज प्रालिलाई खाद्य स्वच्छता मापदण्ड उल्लङ्घन गरेको आरोपमा ५० हजार रुपैयाँ जरिवाना गरिएको छ। घटनाअनुसार सहायक प्रमुख जिल्ला अधिकारी पोषणराज भण्डारी नेतृत्वको अनुगमन टोलीले होटलमा खाना खाने क्रममा सागको परिकारमा सङ्खे कीरा भेटिएपछि तत्काल अनुगमन अघि बढाएको थियो। त्यसपछि गरिएको निरीक्षणमा होटलमा प्रयोग भइरहेका खाद्य सामग्री, भण्डारण अवस्था तथा तयार पारिएका परिकारहरू खाद्य स्वच्छता मापदण्डअनुसार नभएको पाइएको जनाइएको छ।अनुगमन टोलीका अनुसार होटलमा प्रयोग भएका केही खाद्य सामग्री अस्वस्थकर अवस्थामा रहेको, सरसफाइमा लापरबाही देखिएको तथा खाद्य सुरक्षासम्बन्धी न्यूनतम मापदण्डसमेत पालना नगरेको पाइएपछि सम्बन्धित कानुनी व्यवस्थाअनुसार ५० हजार रुपैयाँ जरिवाना गरिएको हो।

प्रशासनले खाद्य व्यवसाय सञ्चालन गर्ने सबै होटल, रेस्टुरेन्ट तथा खाद्य प्रतिष्ठानलाई स्वच्छता, गुणस्तर र उपभोक्ताको स्वास्थ्यप्रति संवेदनशील बन्न आग्रह गरेको छ। साथै, खाद्य सुरक्षासम्बन्धी मापदण्डको पालना नगर्ने व्यवसायमाथि आगामी दिनमा पनि नियमित अनुगमन र आवश्यक कानुनी कारबाहीलाई निरन्तरता दिइने जनाएको छ।यस घटनाले खाद्य स्वच्छता र उपभोक्ताको स्वास्थ्य सुरक्षाप्रति व्यवसायीको जिम्मेवारीबारे पुनः गम्भीर प्रश्न उठाएको छ। उपभोक्ताले पनि खाना सेवन गर्दा गुणस्तर र सरसफाइप्रति सचेत रहन तथा कुनै अनियमितता भेटिए सम्बन्धित निकायमा जानकारी गराउन प्रशासनले अनुरोध गरेको छ।