राष्ट्रिय गौरवको आयोजनाका रूपमा रहेको काठमाडौं–तराई/मधेश द्रुतमार्ग (फास्ट ट्र्याक) निर्माण कार्य निर्धारित समयमै सम्पन्न हुनेमा पुनः प्रश्न उठ्न थालेको छ । करिब ७२.५ किलोमिटर लामो यस द्रुतमार्ग आयोजनाको भौतिक प्रगति हालसम्म ४६.८८ प्रतिशत मात्रै पुगेको छ भने आयोजना सम्पन्न गर्न अब करिब ११ महिना मात्र बाँकी रहेको छ । काठमाडौंलाई तराईसँग छोटो दूरीमा जोड्ने उद्देश्यसहित निर्माण भइरहेको यस द्रुतमार्गमा सुरुङमार्ग र पुल निर्माणलाई मुख्य प्राथमिकतामा राखिएको छ । आयोजनाअन्तर्गत निर्माण भइरहेका अधिकांश सुरुङमार्ग तथा पुलको काम तीव्र रूपमा अघि बढाइए पनि केही संवेदनशील क्षेत्रमा देखिएको विवादले समग्र निर्माण प्रक्रियामा असर पारिरहेको छ । विशेषगरी ललितपुरको खोकना क्षेत्रमा देखिएको स्थानीय विवाद आयोजनाको सबैभन्दा ठूलो चुनौती बनेको छ । मुआब्जा विवाद, पुरातात्त्विक तथा सांस्कृतिक सम्पदाको संरक्षणको माग, साथै गुुठी जग्गासम्बन्धी समस्याका कारण उक्त क्षेत्रमा प्रवेशद्वार निर्माणको काम प्रभावित भएको बताइएको छ ।

नेपाली सेनाले निर्माणको जिम्मा सम्हालिरहेको यस आयोजनाको प्रगति विवरणअनुसार विभिन्न खण्डमा काम भइरहे पनि समग्र प्रगति अपेक्षाअनुसार हुन सकेको छैन । निर्धारित समयसीमाभित्र आयोजना सम्पन्न गर्न सरकार र निर्माण व्यवस्थापनमाथि दबाब बढ्दै गएको छ । सरकारले देशकै रणनीतिक महत्वको पूर्वाधारका रूपमा व्याख्या गर्दै आएको फास्ट ट्र्याक समयमै सम्पन्न भए काठमाडौं र तराईबीचको यात्रा समय उल्लेखनीय रूपमा घट्ने अपेक्षा गरिएको छ । तर, बाँकी अवधिमा अझै आधाभन्दा बढी काम सम्पन्न गर्नुपर्ने अवस्थाले आयोजनाको भविष्यप्रति चिन्ता बढाएको छ ।