लगातारको वर्षापछि खसेको पहिरोका कारण स्याङ्जाको वालिङ नगरपालिकाका दुई महत्त्वपूर्ण सडक खण्ड अवरुद्ध भएका छन्। सडक अवरुद्ध हुँदा स्थानीय बासिन्दा, यात्रु तथा दैनिक उपभोग्य वस्तुको ढुवानी प्रभावित भएको छ। जिल्ला प्रहरी कार्यालयका अनुसार वालिङ नगरपालिका–७ स्थित लभ्लीडाँडा क्षेत्रमा पहिरो खस्दा मिर्दि–चापाकोट सडक खण्ड पूर्ण रूपमा अवरुद्ध भएको छ। पहिरोले सडक पुरिएपछि उक्त मार्ग भएर सवारीसाधन सञ्चालन हुन सकेको छैन ।त्यसैगरी, वालिङ नगरपालिका–१४ को डुम्रिभञ्ज्याङ क्षेत्रमा पनि पहिरो खस्दा वालिङ–हुवास भित्री पक्की सडक अवरुद्ध भएको छ। दुवै सडक बन्द हुँदा स्थानीय आवतजावतमा समस्या उत्पन्न भएको छ भने वैकल्पिक मार्ग प्रयोग गर्नुपर्ने अवस्था सिर्जना भएको छ।प्रहरीले स्थानीय तह तथा सम्बन्धित निकायसँग समन्वय गरी दुवै स्थानमा सडक खुलाउने प्रयास जारी रहेको जनाएको छ। पहिरो हटाउन आवश्यक उपकरण परिचालन गर्ने तयारी भइरहेको र मौसमले साथ दिएमा सडक छिट्टै सञ्चालनमा ल्याउने लक्ष्य रहेको बताइएको छ।

निरन्तर वर्षाका कारण स्याङ्जाका विभिन्न स्थानमा पहिरोको जोखिम बढेकाले अत्यावश्यक कामबाहेक जोखिमयुक्त सडकमा यात्रा नगर्न जिल्ला प्रशासन र सुरक्षा निकायले सर्वसाधारणलाई आग्रह गरेका छन्। विशेषगरी पहाडी तथा भित्री सडकमा यात्रा गर्दा मौसमको अवस्था बुझेर मात्र यात्रा गर्न र सम्भावित जोखिमप्रति सचेत रहन अनुरोध गरिएको छ।वर्षायामसँगै पहिरो र सडक अवरोधका घटना बढ्न थालेपछि स्थानीयवासीले दीर्घकालीन रूपमा जोखिम न्यूनीकरणका उपाय प्रभावकारी बनाउन सम्बन्धित निकायसँग माग गरेका छन्।