सूचना तथा सञ्चारमन्त्री डा. विक्रम तिमिल्सिनाले नेपाल टेलिकमको सेवा विस्तार र गुणस्तर सुधारलाई उच्च प्राथमिकतामा राख्दै देखिएका प्राविधिक तथा संरचनागत समस्या तत्काल समाधान गर्न सम्बन्धित निकायलाई निर्देशन दिएका छन्। उनले देशभर सञ्चालित टेलिकमका टावरहरूमा सम्भव भएसम्म भरपर्दो विद्युत् आपूर्ति सुनिश्चित गर्न आवश्यक समन्वय गर्न पनि जोड दिएका छन्। बुधबार सञ्चार तथा सूचना प्रविधि मन्त्रालयमा आयोजित अन्तर–निकाय समन्वय बैठकमा मन्त्री तिमिल्सिनाले दूरसञ्चार सेवा नागरिकको आधारभूत आवश्यकतासँग जोडिएको उल्लेख गर्दै सेवा अवरुद्ध हुने अवस्थाको अन्त्य गर्न सबै निकायले प्रभावकारी रूपमा सहकार्य गर्नुपर्ने बताए। बैठकमा नेपाल टेलिकमकी प्रबन्ध निर्देशक सङ्गीता पहाडी, नेपाल विद्युत् प्राधिकरणको वितरण तथा ग्राहक सेवा निर्देशनालयका प्रमुख राजन ढकाल तथा वैकल्पिक ऊर्जा प्रवर्द्धन केन्द्रका कार्यकारी निर्देशक नवराज ढकाललगायतका उच्च अधिकारीहरूको सहभागिता रहेको थियो।

छलफलका क्रममा टेलिकमका बेस स्टेशन तथा टावरहरूमा हुने विद्युत् आपूर्तिको समस्या, सेवा अवरोधका कारण तथा वैकल्पिक ऊर्जा प्रणालीको उपयोग बढाउने विषयमा विस्तृत समीक्षा गरिएको थियो। ग्रामीण तथा दुर्गम क्षेत्रमा सञ्चार सेवा अझ भरपर्दो बनाउन सौर्य ऊर्जा लगायतका वैकल्पिक स्रोतको प्रयोग विस्तार गर्ने विषयमा समेत छलफल भएको जनाइएको छ। मन्त्री तिमिल्सिनाले नेपाल विद्युत् प्राधिकरण, वैकल्पिक ऊर्जा प्रवर्द्धन केन्द्र र नेपाल टेलिकमबीच प्रभावकारी समन्वय कायम गरी विद्युत् आपूर्तिका कारण सेवा प्रभावित हुने अवस्थालाई न्यूनतम बनाउने गरी तत्काल कार्ययोजना कार्यान्वयन गर्न निर्देशन दिएका छन्। सरकारले डिजिटल नेपाल अभियानलाई प्रभावकारी बनाउन दूरसञ्चार पूर्वाधारलाई थप सुदृढ गर्ने लक्ष्य लिएको अवस्थामा मन्त्रीको यो निर्देशनलाई सेवा गुणस्तर सुधारतर्फको महत्त्वपूर्ण कदमका रूपमा हेरिएको छ। यसबाट देशभरका टेलिकम प्रयोगकर्ताले थप स्थिर, भरपर्दो र गुणस्तरीय सञ्चार सेवा प्राप्त गर्ने अपेक्षा गरिएको छ।