शिक्षा तथा खेलकुद प्रविधि मन्त्रालयले प्राविधिक शिक्षा तथा व्यावसायिक तालिम परिषद् (सीटीईभीटी) को एकेडेमिक काउन्सिलमा चार प्रतिष्ठित विज्ञलाई सदस्यका रूपमा मनोनयन गरेको छ। मन्त्रालयले सूचना प्रविधि, उद्योग, स्टेम शिक्षा तथा नर्सिङ–जनस्वास्थ्य क्षेत्रका अनुभवी व्यक्तित्वलाई समेट्दै काउन्सिललाई थप प्रभावकारी बनाउने प्रयास गरेको हो। नवनियुक्त सदस्यहरूमा आईटी तथा डिजिटल नीति विज्ञ डा. अमृता शर्मा, नेपाल उद्योग परिसंघका अध्यक्ष विरेन्द्रराज पाण्डे, कर्खानाका सहसंस्थापक तथा स्टेम शिक्षा विज्ञ डा. दिपेश्वरमान श्रेष्ठ र नर्सिङ तथा जनस्वास्थ्य क्षेत्रकी विज्ञ प्रमिला राना रहेका छन्। सीटीईभीटीको एकेडेमिक काउन्सिल परिषद्को शैक्षिक तथा प्राज्ञिक नेतृत्व गर्ने सर्वोच्च निकायका रूपमा परिचित छ। यसले पाठ्यक्रम निर्माण तथा परिमार्जन, नयाँ शैक्षिक कार्यक्रम स्वीकृति, गुणस्तर सुनिश्चितता, मूल्यांकन प्रणालीको विकास तथा प्राविधिक एवं व्यावसायिक शिक्षासम्बन्धी दीर्घकालीन नीतिगत निर्णयमा महत्वपूर्ण भूमिका निर्वाह गर्दै आएको छ। नवनियुक्त सदस्यहरूमध्ये डा. अमृता शर्मा सूचना प्रविधि, डिजिटल रूपान्तरण, डिजिटल अर्थतन्त्र तथा सार्वजनिक नीतिका क्षेत्रमा सक्रिय अनुसन्धानकर्ता र नीतिगत विज्ञका रूपमा परिचित छिन्। डिजिटल प्रविधिमार्फत शिक्षा तथा सार्वजनिक सेवा सुधारमा उनको योगदान उल्लेखनीय मानिन्छ।

त्यसैगरी, विरेन्द्रराज पाण्डे नेपाल उद्योग परिसंघका अध्यक्ष हुनुका साथै निर्माण, पूर्वाधार तथा औद्योगिक क्षेत्रका स्थापित उद्यमी हुन्। उनको अनुभवले प्राविधिक शिक्षालाई उद्योग र रोजगारीसँग अझ प्रभावकारी रूपमा जोड्न सहयोग पुग्ने अपेक्षा गरिएको छ। डा. दिपेश्वरमान श्रेष्ठ कर्खानाका सहसंस्थापक तथा स्टेम शिक्षाका विशेषज्ञ हुन्। उनले अमेरिकाको टफ्ट्स विश्वविद्यालयबाट स्टेम शिक्षामा विद्यावारिधि गरेका छन्। नवप्रवर्तन, प्रयोगात्मक सिकाइ र आधुनिक शिक्षण प्रणालीका क्षेत्रमा उनको अनुभवले प्राविधिक शिक्षामा नयाँ आयाम थप्ने विश्वास गरिएको छ। यस्तै, प्रमिला राना नर्सिङ तथा जनस्वास्थ्य क्षेत्रकी अनुभवी विज्ञ हुन्। उनले भारतबाट नर्सिङमा स्नातकोत्तर उपाधि हासिल गर्नुका साथै नेदरल्यान्ड्सको वागेनिङ्गेन विश्वविद्यालयबाट स्वास्थ्य तथा समाज विषयमा फेलोसिप पूरा गरेकी छन्। स्वास्थ्य शिक्षाको गुणस्तर अभिवृद्धिमा उनको अनुभव उपयोगी हुने अपेक्षा गरिएको छ। विभिन्न क्षेत्रका अनुभवी विज्ञहरूको सहभागिताले सीटीईभीटीको शैक्षिक नीति, पाठ्यक्रम विकास तथा प्राविधिक शिक्षाको गुणस्तर सुधारमा सकारात्मक प्रभाव पर्ने विश्वास मन्त्रालयले व्यक्त गरेको छ। साथै, उद्योग, प्रविधि, अनुसन्धान र स्वास्थ्य क्षेत्रको अनुभवलाई प्राविधिक शिक्षासँग जोड्दै दक्ष जनशक्ति उत्पादनमा समेत नयाँ गति आउने अपेक्षा गरिएको छ।